المشكلة لاتتعلق برأيي تماما بنظام التعليم أكثر من المنظومة الفاسدة التي تقوده،أعداد كبيرة من الأطفال في الصف، تمييز ومشاكل، غيابات و اهتمام بإعطاء المنهج لاشرحه والتفاعل(لاأرى مشكلة في الحفظ للصغار فجمع المعلومات أول مراحل المعرفة) اختصار التعليم بالامتحان والعلامات والتقييم بناء عليه(لذا كثر الغش)

غير الروتين القاتل وكمية التواقيع الرهيبة شو كمية المناصب الموجودة. أمين الجامعة و أمين الجامعة للشؤون العلمية و أمين الجامعة للشؤون الإداربة و نائب مساعد أمين الجامعة للبحث العلمي و مائب مسةعد لما بعرف شو و غيره و غيره ومكاتب مكاتب و كل منصب إله مكتب سكرتارية ومديرة مكتب .. لقد ضعت

فقرة النق: أنا بكره العطور والبارفانات القوية بأماكن الشغل. عم تابع أوراقي بجامعة اللادقية و إن كان في تحسن كتير بالمعاملة (ماشاء الله) بس هيك مزعج

على النت مثلا ممكن أتجنب اللي لسانه بذيء و أحمق/اختلاف بالأصول، لكن أكتر مابحس بيكشف الأشخاص هي المواضيع الاجتماعية اللي بتبين تفكير وبيئة الشخص. المتعنت بأمر ذكورية/نسوية، اللي بياخد آراء متطرفة و بععم عليها لجندر كامل، اللي بينساق ورا انفعال لدرجة الظلم. اللي مستعد يحكم و يلغي حقوق الآخر بأنانية.

بعد الافتقاد للعيلة، تظبيط الميزانية و دفع الفواتير و الحسابات،والعقود تبع الشركات وقوانينهم وتعاملاتهم، أكرهها أكرهها وأولتها حسيت فتت بالحيط شوي لتأقلمت والبيروقراطية الورقية بكل شي. التوتر أنه ماجنبك حدا يدعمك مباشر أو يحمل عنك بس بالنهاية إيجابياتها من تطور الشخصية وفهم آفاق للحياة جديدة

ماترموني بهالهرطقة بس نحنا بجبلة عنا نوع تالت من المجدرة هي شعيرية بعدس .. شعيرية محمصة مع شوية رز وعدس 😌

بالمدينة اللي كنت فيها بألمانيا كل سنة مرة أو مرتين بلاقوا قنابل من الحرب العالمية (غالبا أمريكية) غير متفجرة. وبيعملوا إخلاء لمنطقة واسعة جدا حوالين القنابل وبيعلنوا عنا قبل بشهر وغالبا بتكون ليوم كامل أو أكتر. الشرطة و الدرونز الحرارية بتجوب المنطقة من وقت الإخلاء وماببلشوا ليتأكدوا أنه مافي حدا

بحالات ناااادرة جدا وقت تسلم الزوجة ويحسن إسلامها قد تعطي نتائج طيبة. عنا بجبلة شيخ سلفي مجاهد والدته علوية و هو من معتقلي صيدنايا هو وابنه الكبير قبل الثورة. حاربه النظام وفقد ساقه و وقت بدأت الثورة كل أبناؤه التحقوا بالمجاهدين والصغير استشهد بكمين بعد التحرير. لكن الاستثناءات فقط تعزز القاعدة

بحب التغيير بالأشياء المقدور عليها،يمكن مو بنظام الحياة اليومي ومواعيده لكن لازم غير الديكور كل فترة، فناجين القهوة والماغات و الزهر و الترتيب. الروتين منيح لما بيعطي حالة استدامة لتتعلم شي جديد لأنك ملتزم بمواعيد وساعات، التغيير المستمر بنظام الحياة قد يخلق فوضى وعدم تركيز أوقات وأشيا لاتكتمل

لو شخص مقرب كمرحلة أولى فرجيه الحالة الإيجابية المعاكسة "الحمدلله ماصار فيك أكتر" "إي عادي بتصير للجميع" و بينله أنه هاد سخط على أقدار الله وجبله حديث أو شي عن المتشائمين. لو مانفع قاطعه وماتخليه يكمل "لو بدك تحكي هيك بروح"، "اللي فيني مكفيني"، غير الموضوع، لو مانفع: خفف معه قدر الإمكان لو أنت متضرر

صحيح، غير أنه الحالة المذكورة لا تتعلق بسفاهة "كلامية" و إنما سفاهة "فكرية" و أخلاقية. وبالتالي لاينطبق عليه مثل "البيت اللي مافي صايع حقه صايع" (بغض النظر عن الموافقة ) لأن التصهين هو عداء لنا ولقيمنا ولأخوتنا أكثر من كونه جكارة بالمحورجية. سبهم متل مابدك هي صحيفتك لكن العقيدة الفكرية أمر آخر

لحظة العدالة أو شيء واضح منها .. العدالة بكتار و لكتار لحظة الاستقرار أو الإحساس فيه

أوووه هي النقطة شو مهمة. صرت لما دور على بوزيشين جديد أبحث عن البروف اللي مسموعيته يالتعامل جيدة أو أعرف طبيعة فريقه قبل مادور على شطارته وأبحاثه و بأي جورنالز عم ينشر. البيئة المسمومة قاتلة و بتدمر النفسية و الإنتاج و بتسبب إرهاق و بتقتل الإبداع بأوقات كتير. شفت أشخاص احتاجوا لاستشارة نفسية ليكملوا

بكره روسيا بس بحب الأدب الروسي. الكتاب الجدد/المؤثرين بالميديا مابحب كتاباتهم أمثال العمري و غيره كتب التنمية البشرية والبرمجة العصبية العربية والأجنبية بغالبيتها هي ضياع مصاري

في ظلال القرآن طبعة دار الشروق. ممكن ماخلّصت كل المجلدات لكن الإحساس بالآيات مع الأسلوب الأدبي الفريد مابقدر أتجاوزه. مسلكيات وسلطة الثقافة الغالبة للسكران. الإسلام بين الشرق والغرب لعلي عزت بيغوفيتش. مؤخرا البلاء الشديد والميلاد الجديد لفايز الكندري. وبحب روايات آغاثا كريستي كشي لطيف ظريف 😁

لايوجد أي عضو من مجلس الشعب من مؤيدي النظام الساقط 😑

المجتمع الدولي والدول العربية يدعم استقرار سوريا موحدة

الخير لاينتصر دائما متل أفلام الكرتون و الظالم و الفاسد و الكذاب و المؤذي ممكن ببساطة يعيش حياته وماياخد عقابه بالدنيا و مو ضروري العوض يجي فعليا متل مابتتحيل أو حتى يجي أصلا بس لكونك طيب ومنيح إنما هو بمشيئة الله و حكمته و إعطاءك الصبر عهالشي هو رحمة منه لكن مافي شي بضيع عنده بالآخرة

صور أسهل من الكتابة .. هي بس اللي ذاكرتهم عالسريع

قبل ما أكتب اسمي بالعربي كان كتار يفترضوها براء و يخاطبوني كشب 😒😑

لأجل السلم الأهلي كل اللهجات حلوين ماعدا وحدة .. لهجة أهل محققي الأفرع الأمنية وحاضنتهم .. للأسف جيرانا

حغير شوي عن تطبيقات الميديا باعتبار كتار طلاب: Quillbot/Grammarly للكتابة (كتاباتكم أنتو مشان الplagiarism) وتصحيح النصوص Amboss لطلاب الطب والعلوم الحيوية، اللي ساعدني أنه كان عندي حساب بالجامعة Researcher/Researchgate مشان المقالات العلمية Zoo for Zotero للفهارس

ترمب خسر نوبل للسلام بعد ما "أوقف عدد من الحروب حسب تصريحه" 😂😂 .. يييي هلأ بيحرد و برجع الحروب

يمكن أنت مزعوج ومتدايق وغاضب فبعطيك عذرك والله يفرج عنك لكن التعميم بأي شي دائما مجحف وظالم. يمكن أنا مو من المدينة لكن لساتني ضمن المحافظة وأحَب الرفقات على قلبي من وقت الجامعة وأطيبهم وأكرمهم منها، يمكن سافرنا وتغربنا وبقيوا هم اللي مابدلوا ولاتغيروا. اللادقية حلوة بطبيعتها وناسها

هي الأمور ليست مجرد احتياجات أو أرزاق إنما هي الاختبارات اللي بتمر فيها بالدنيا لمكانك بالآخرة إن أعطيتها أو منعها الله عنك و ماذا فعلت بها،نيتك منها و إذا أديت الأمانة أو لأ،أحسنت لزوجك/زوجتك،للأولاد أنشأتهم على عبادة الله،المال حرام أم حلال، هل شكرت، هل مُنعت إحداها فصبرت ورضيت، هل ألهتك عن الله؟

المديرة اللي عاقبت الطلاب بالضرب توقف عن العمل ماشي بس مدرس التاريخ العلوي بمدرسة جهاد بجبلة بسب الثورة و بيعلن للطالبات أنه مابيعترف بالشرع و أنه بده عودة الساقط وحكمه و ببجل فيه وبيعملهم أبطال و بينكر شهداء صيدنايا وبيرفض تدريس منهاج التاريخ الجديد و بعدين بينقلوه على مدرسة تانية فقط لاغير ..

معليه فقرة النق أنا بكره عبارة "في أسرع وقت ممكن" بسوريا لأي مشكلة ولا عطل لأنه معناها راحت أيام وأسابيع بعد ماعطونا أمل غبي. طيب حطوا جدول زمني مع buffer time قبلانين بس بلاها هالعبارة الغامضة.

كانت من الأمور الإيجابية (النادرة) للعمل بالأكاديميا بألمانيا أنه الدوام مفتوح لحد ما (مافي مواقيت عالدقيقة، باستثناء إذا في تجربة بالمخبر أو اجتماع أو سيمنار أو محاضرة) المهم إنجاز العمل (اللي مابيخلص) هالمرونة كانت مريحة لحد ما و بتساعد على التحكم بالأوقات.

باعتبار بالمرتين متصدرة و مع منصب كمان 🫅 فتقبل التهاني والتبريكات إذا في هدايا .. شكرا لتفهمكم

عم تحكيلي أنه طلعوا رحلة فإحدى السيدات طلبت ميزات معينة لأنها "أم شهيد" فقاطعتها أنه إي اجبروا بخاطرها وخصوصي أنه بعرف العيلة ضد النظام فقالتلي لأ ابنها مات مع النظام الساقط، كان طالب جامعة وبحب صبية وأمه رفضت تخطبله ياها فليجاكرهم تطوع مع الدفاع الوطني ومات بعد شهر. أنه معتبرته شهيد. ضياع الخاتمة

اللي بدو "يتبرع=يمول تجار المخدرات المرتزقين" لاينسى العملة الرسمية هي الشيكل

وجود أهلي ربما هو الشيء الشعوري القوي الوحيد تقريبا اللي كان يربطني بمدينتي بآخر سنتين من عمر الثورة وأنا بألمانيا بعد ماصارت جبلة تعتبر كأنها محتلة نظاميا. كل الشي تغير بعد التحرير، المشاعر والإرتباط والرغبة، هالنصر غير كتير أشيا فينا، أعطانا أمل كان مدفون تحت ركام اليأس والموت والهجرة والفقد.

المظاهر و الأنزعة

ذكرتيني يا راما. بسيشن الhistology العملي لطلاب الطب بألمانيا مسمحلهم التصوير من كاميرا المجهر و تنزيل المقاطع النسيجية بشكل مسبق على الفونز والآيبادز و صار في سهولة برسم المحضرات. لكن بروفيسوري مصر أنهم يرسموا مباشرة من المجهر لأنه بيعتبر أنه بيعمل تواصل بين اليد والدماغ وبركز المعلومة.

في فقد ثقة بين الطرفين(بين الشعب كله) والطبابة بالذات هو معاناة لكتار وخصوصي اللي عنده حدا مريض مزمن بصير متل ثقب أسود ماديا من المعاينة لسعر الدوا للتحاليل. في بعض الأطباء لو رجع عنده المريض ليفرجيه التحاليل بياخد فيزيتا منه. ممارسات البعض الغلط و "التجارية" أوقات بتتعمم عالغالبية و بصيروا "كلهم"

بالمعهد اللي عملت فيه الدكتوراه كانت السكرتيرة والمخبريات وحتى الدكاترة أوقات مابوفروا حكي على حدا حتى عالبروف رئيس القسم (بيستاهل هو من المدرسة الألمانية المتعنتة)و ممكن ينقلوا كمان حكي. ولما بسافر البروف، فترة الغدا والقهوة بتصير من ساعة ونص لساعتين وأصواتهم لآخر الكوريدور وبحسسوك أنهم تحرروا منه

وقت إجا الشيخ عبدالرزاق المهدي على جبلة وأعطى دروس في التوحيد وأنواع التوحيد، فأحد "المريدين" لأحد شيوخ الصوفية عنا قاله لأخي شو هالكلام ماسمعانين فيه وصار يهاجم الشيخ بالاتهامات اللي حافظها عن السلفية. فجاوبه أخي طيب قال شي غير قال الله وقال رسوله وأحاديث صحيحة؟ إجا ردله بالحرف: إي بس مو مقتنع 🤦‍♀️🤓

عن جد مافي أبيخ من ال sore loser مافيو يتقبل خسارته ولازم يعصب ويلوم الآخرين ويطلع بمظهر الضحية و يخرب الموضوع و أنه الكل متآمربن ضده 🤦‍♀️

نوار نجم عضو لحنة الانتخابات العليا بس كتب تغريدة أنه المحلس خال من داعمي النظام الساقط وبلشت التغريدات عن رامي محفوض 🤣🤣 كفووو الشعب .. جبلة لازم تصير ترند شي فلول عسكرية شي سياسية .. ماحنخلص

اللادقية المدينة منيح التلات مرشحين سنة بس مابعرف تاربخهم الثوري، جبلة واحد سني و واحد علوي شكلهم متفقين علبها أصلا محاصصة، السني طلع من بداية الثورة مع عائلته و مصالحه لمصر وبعدها على تركيا، والعلوي يقال أنه كان قريب من علي دوبا، الحفة سني كمان .. هيك بكون محافظة اللاذقية خمسة سنة و تنين علوية

تصحيح: مقاعد اللاذقية التلاتة كلها طلعوا سنة من بينهم سيدة و الحفة سني .. بيبقى مقعد القرداحة علوي و جبلة واحد سني و واحد علوي ..

توثيقا للخيبة: صار عنا بجبلة محاصصة طائفية يبدو عالمقعدين وفاز واحد سني (ماكان فيه غير مرشحين) و واحد علوي والاتنين لايعول عليهم. هو من وقت طلعت أسماء اللحنة الانتخابية وبعض الانتهازيين اللي فيها كان شي متوقع أنه متفقين عليها. واحد علوي طبعا عن القرداحة و اتنين سنة باللاذقية (بينهم سيدة) وعلوي.

هلأ الكل ركز على 15/18 و ما انتبهوا أنه ماعاد فيه عيد الحركة التصحيحية و حرب تشرين ولا الشهداء و لا عيد الشجرة و مابعرف شو 🤣🤣.. من كترتهم كنت عطل بلا ما أتذكر شو العطلة أصلا ..

بالمدن الصغيرة مو بس الناس بتعرف بعضها لكن إلا ماتلاقوا أنهم قرايب مثلا بأخ ابن عم الجد السابع أو هيك شي. وماشاء الله في ناس ممكن تسردلك شبكة القرابة من كنة ست جد بنت أخ عم فلان و أنا بحسها متل الشبكات العنكبوتية أكتر من قرايب درجة أولى وتانية مافيي تابع معهم.

الوضع الاقتصادي و طبيعة الإقامات هون وبالمهجر كتير عم يتحكم بقرارات الناس مهما كانت مشاعرها. في صبية، زوجها و والديها ببلجيكا و هي و بنوتتها بتركيا (عندها شغلها وراتبها منيح) و أخوها وعيلة زوجها بسوريا و هي نزلت عندهم فترة صغيرة لتشوفهم وراجعة. فتخيلوا

يحب الناس القوي و يتبعونه اتبع الحق أم جافاه، و قد يتعلق بالحق المنتصر أسافل الناس و حقراءهم و يتسلق عليه منافقيهم، لذا قيل أنه من سنة الله أن يأتي زمان يضعف فيه الحق وأهله حتى لايتبعه إلا من آمن به حقا فدفع تكاليفه. { ليهلك من هلك عن بينة ويحيى من حي عن بينة }

😃😃 حلو كسر "الأصنام" على هالتطبيق، من كل الأنواع. والحلو ماحدا عم يهاجم حدا بشكل حدي. فيروز لابحبها ولابكرهها، ومابعرف من وين إجا هالارتباط "المسلّم فيه" بين "الثقافة" و الصباح و الرواء و "الرقي" و "النخبة" وأغانيها .. بس لعلاقتهم بالرحابنة مثلا!!

يمكن الحب هو الشعور الوحيد اللي ماإله شكل واحد محدد لكن الأكيد أنه هالشعور لايمكن يخبي حاله، رح يظهر بالأفعال و لفتات الكلام و لغة العيون و امتداد الأوقات و ملء الفراغات و دقات القلب و الصبر و التمسك و التضحية

قصة حقيقية: كانوا جيرانا عندهم ولاد شقوة ماشاء الله ما بيفلت حيوان من تحت إيدهم .. هلا بعد ما انتقلوا صرنا المسا بأوقات نسمع كلب عم يعوي براحته، قطط أحيانا هيك .. المهم شوفوا العبرة 😂