Guda (@urtsua.bsky.social)

AEBek Venezuelatik ateratako beste ontzi bati egin dio eraso, droga zeramala argudiatuta Donald Trump AEBetako presidenteak berak jakinarazi du: AEBetako armadak Venezuelatik ateratako ontzi bati egin dio eraso Karibe itsasoan, haren esanetan, kokaina eta fentaniloa zeramaten. Hiru pertsona hil dira erasoan. Denbora gutxian AEBek Karibe itsasoan egiten duten bigarren erasoa da. Trumpek Truth Social sare sozialean eman du erasoaren berri: «Gaur goizean, nire agindupean, AEBetako indar militarrek bigarren eraso bat egin dute narkotrafiko eta narkoterroristen aurka –egiaztatutako narkoterroristak ziren, eta biziki biolentoak–, Hegoaldeko Komandoaren ardurapeko eremuan». Bideo bat ere atxiki du; argi eta garbi ikus daiteke ontziaren gainera lehergailu bat nola botatzen duten. Azaldu du erasoa gertatu dela Venezuelako hiru «terrorista horiek droga zeramatelako» AEBetara, eta salatu droga «estatubatuarrak pozointzen dituen arma hilgarria» dela. Erantsi du narkotrafikoko sare horiek «mehatxu bat» direla herrialdearen segurtasunerako. Bestalde, Nicolas Maduro Venezuelako presidenteak adierazi du AEBek egindakoa ez dela tentsioa areagotzea, «erabateko erasoa» baizik. Are, «eraso militar batean aurrean», eta nazioarteko zuzenbidearen arabera, Venezuelak «erantzuteko eskubidea» duela gaineratu du. Venezuelak «defentsarako eskubide legitimoa» duela aldarrikatu du Madurok: herrialdea «borroka armatu baterako prestatuago» dagoela adierazi du, baldin eta AEBek eraso egiten badiote. Gustavo Petro Kolonbiako presidenteak salatu du AEBetako armadak goizean egin duena «erahilketa» dela: «Armarik gabeko eta blindatu gabeko ontzi bateko hiru bidaiariri eraso egitea erahilketa da; AEBetako Gobernua pertsona latinoamerikarrak hiltzen ari da beraien lurrean bertan». Iritzi dio erasoa Venezuelako itsasoan gertatu zela, eta AEBek ez dutela bertan eraso egiteko eskubiderik. http://dlvr.it/TN5kCP