Ny wonn konvedhes. Ha pandr'yw an gwayn? Clip art kawgh? Tus ow lawl bos 'margh' leverys "mark"? Pandr'yw an GWAYN?

Piw a'n jeves ervirans bledhen nowydh dhe grefhe skoodhyans an yeth war neb kor? My a'm beus onan - kavos ger gwell ages 'ervirans' rag an Sowsnek 'resolution' 😂😂😂

'kyj' yw 'qij' yn Albaniek (Shqip). Ny wor lies den henna...

Re dhiwedhes arta rag dysmygi neppyth dhe skrifa rag #KevardhuEbronlas. Gras dhe Dhuw nyns eus marnas unn jydh moy a hemma. Ny wonn mars ov lowen po diswaytys! 🤔🤣

My a ankovas postya hedhyw ha lemmyn re dhiwedhes yw rag dysmygi neppyth didheurek. Mes dhe'n lyha my re bostyas neppyth, kyn fo flows. Ogh, my a glewas henna - piw a leveris, "Kepar ha pub post a-dhyworthis!"?

Pyth yw lavar gwiw rag 'the sales'? Re efan, kemmyn hag ankomparek yw 'an gwerthow' sempel, yn surredi. Martesen 'an bargenwerthow'? An dra yw, ow gwreg eth dhedha nans yw peswar our ha my a omwovyn mar kwra hi dos tre kyns my dhe vos dhe'n gweli haneth...

Neppyth berr hedhyw drefen bos etek person y'n chi ha kler yw ny wrons mos tre kyns hanter-nos dhe'n lyha! Arghgh!

Nadelik Lowen dhywgh hwi oll. a gesebronlasysi!

Nos Nadelik, ha hedhyw ow mab wynn a leveris dhymm (mes a'n glas, dell leveryn yn Sowsnek) bos homma an 224ves penn-bloodh a hwarvos arbennik - an kynsa prov a jynn ethen trethysi Trevithick, 'Dyowl ow Hwytha' y hanow. Yn Kammbronn. War vre.

Yn dewdhegves dydh Nadelik, Dhymmo y ros ow har: Dewdhek tekst hengovek, Unnek tesenn safron, Deg jynnji kowrek, Naw bardh ow tonsya, Eth pel rag hurlya, Seyth kok ow koelya, Hwegh para rugbi, PYMP PASTI BRAS! Peswar brithel brav, Tri den bal, Dew grows keltek koth, Ha palores war varr a eythin.

Kwys Nadelik nowydh a sew. An govyn yw, py lies pasti esa dhymm wosa Nadelik?

My a spenas an myttin ow tirewi an rewell (ober skwithus ha lent). Res yw bos moy dhe'n bewnans ages henna!

Kwys rag Nadelik. Henwyn trevow y'n RU treylys dhe Gernewek yn maner pur wocki. Pygemmys a yllowgh kavos? Ganow Genys; Mor El; Mordhos Hogh Bryckys; Ganow Sethik; Rys Gweli; Ker Glow; Pol Avi; Kogh; Klogh Uskis; Gwynsow Po; Ker Gwaynya; Mayni; Splann War

My a gewsis orth dyskadores yn skol agan fleghes wynn hedhyw. Hi: "Ow thas a'n jeves gerlyver kernewek!" My (yntanys): "A wor ev kewsel Kernewek?" Hi: "Na wor. Ev yw kunteller a erlyvrow!" My (diswaytys): "Ha nyns eus marnas *unn* gerlyver kernewek dhodho? My a'm beus unnek anedha!" 🙄

Y'n gan "Dhe-ves Y'n Presep" y kevir linen "The cattle a-lowing..." (treweythyow hedhyw "are lowing"🙄). An 'a-' na yw 'at' herwydh Google (gwir, ytho) - "The cattle at lowing...". Poran kepar ha'n drehevyans kernewek - "An lonnow ow pedhygla..." mayth yw 'ow' an Sowsnek 'at'. Ni a vyw ha dyski!

Dohajydh ow maylya rohow rag an fleghes wynn, karolyow ow seni ha gwedrennas po diw a byment. Lowena!

Yn fyw hag ow potya yw drekkli! Dhyworth BBC Kernow: A book which was loaned out from a library in 1980 has been returned - 45 years later. Music Notation by Gardner Read was loaned out from Penzance Library and, according to its record card, was due to be returned by 25 March 1980.

Nyns o dydh didheurek hedhyw (ow klanhe an forn...). Pandr'a skrifav, ytho? Bardhonek nowydh? Ha wosa lies assay ottomma an sewyans: Ha Tasik Nadelik ow tos An chymbla war-nans yn an nos, Y'n gwelas an gath Ha gans lies brath A'n chassyas dhe-ves a-borpos. Nyns ov prydydh, dell welowgh!

Dydh splann hedhyw - yeth an werin Nadelik an klass Kernewek yn Loundres. Ass o da kewsel Kernewek yn Krows an Myghtern. Mes terosa! My a asas an dra kyns an dus erel ha my a ankovas pe rag an boos! Pana ankombrynsi - ny vedhav gelwys dhe'n hwarvos y'n vledhen a dheu, dell ov sur!

Ass yw kales kavos neppyth didheurek dhe skrifa pub dydh. Eus nebonan a garsa redya a-dro dhe brenassa rag rohow Nadelik? Na? My a grysi y fia yndella!

Hedhyw nebes ahanan a glewas tamm moy a-dro dhe'n pyth re beu ervirys ha'gan yeth lemmyn yn-dann Rann 3 an CEYRM. Didheurek. Nyns o an pyth a waytis, yn gwiryonedh. Yma post a-dhiwedhes a-dro dhe hemma yn Lyverenep - bagas 'I pledge...'. Y fydh keskomunyans sodhogel kyns pell, dell ov sur...

Yth esa benyn leel yn kresen lowarthow ow kwertha lyvrow skrifys gensi ha settys yn Kernow. My a redyas kudhlen onan anedha. My: "Tre yn Kernow ha 'Hartmouth' hy hanow??! Henna a via 'Aberkarow' yn Kernewek". Hi: "Ouuu - my a wra devnydhya henna y'n nessa lyver".

Koweth a dheuth hedhyw. Trigys yw yn Nice, Pow Frynk. Ni eth dhe vosti rag li ha my a dhewisas Salad Nicoise. Ow howeth a leveris dhymm na veu an salad na devisyes yn Nice hag ytho nag yw henwys rag an dre hy honan, mes rag an eghen a oliv arbennik hag yw tevys y'n ranndir na. Piw a'n tybsa?

My a dhegemeras ebost de - fest 'kamm' o an Kernewek. Pan welav Kernewek a'n par na pupprys y fynnav danvon ewnansow dhe'n skrifer. Mes ny wrav nevra (wel ogas ha nevra), rag own a ania po digolenni. Mes...yth omwovynnav mars yw henna fur. Pandr'a dybowgh?

Hedhyw my eth dhe geskan Nadelik yn skol agan myrgh wynn. Mes drefen hi dhe driga yn Kent yth esa edhom a lewya di war hanter a'n M25. Ena drefen kudyn war an fordh yth esa edhom a lewya tre war an hanter aral. Ytho an kylgh kowal. Tri our yn sommen war an fordh euthyk na. Gwynn ow bys...

Wel, my a assayas. Tamm kales o hemma yn gwiryonedh: Y teu Nadelik - Peski a wra an goodh. Gorr, mar pleg, solsow yn Hatt an den koth. Mar nyns eus solsow dhiso jy Diner a via gwiw... Mar nyns eus dhis diner vytholl Dhis bennath Duw.

Ny wrug ogas ha travyth hedhyw (wel, omwolghi, prenassa, taklow a'n par na - ha piw a vynn klewes a henna?) Ytho my a askorras neppyth rag Nadelik (tamm a-varr, dell wonn). Y'n kevir y'n nessa post...

My a wra ankevi skrifa neppyth omma pub dydh y'n mis ma, dell ov sur, mes my a wra assaya y wul. Hedhyw my eth dhe weles fylm - 'Difunewgh Den Marow'. Da lowr o...eghen a "piwa'ngwrug?". Ny veu an spenser y'n kas ma.

Re bo Gool Peran Lowen dhe bubonan!

Bledhen Nowydh Da dhe bub kernewegor oll. Re bo 2025 bledhen sewen rag an yeth!