Investigación e Tecnoloxía Matemática en Galicia (@citmaga.bsky.social)

A USC homenaxea a traxectoria do catedrático Manuel Ladra cun congreso no que participa Efim Zelmanov, medalla Fields | Universidade de Santiago de Compostela Especialistas de referencia internacional no ámbito da álxebra reúnense esta semana na Facultade de Matemáticas no encontro ‘Categorical, homological and computational methods in Algebra’ que homenaxea no seu 70 aniversario o profesor Manuel Ladra, cunha carreira académica e investigadora de máis de catro décadas, fortemente vinculada á USC. Entre as figuras distinguidas que tomarán parte no encontro destaca o profesor Efim Zelmanov, gañador da medalla Fields en 1994, o recoñecemento máis importante outorgado no ámbito matemático, equivalente ao Premio Nobel. Zelmanov aproveitou a súa visita para asinar no libro de honra da Facultade, acompañado polo decano Alberto Cabada. O Congreso está organizado coa colaboración da Facultade de Matemáticas, o Centro de Investigación e Tecnoloxía Matemática de Galicia (CITMAga), a Agencia Estatal de Investigación (AEI) e a Consellaría de Educación, Ciencia, Universidades e FP da Xunta de Galicia. Na sesión inaugural do mércores participaron a reitora da USC, Rosa M. Crujeiras; o representante do Comité Organizador, Xabier García Martínez; o representante do Comité de Dirección (en funcións) do CITMAga, Miguel Brozos Vázquez; e o decano do centro. Baixo o nome MANOLOFEST, o evento contempla un programa científico que inclúe relatorios de investigadoras e investigadores de primeiro nivel mundial, presentación de pósters e unha enriquecedora programación social. As contribucións matemáticas de Manuel Ladra O catedrático de Álxebra, que desenvolveu toda a súa traxectoria docente, científica e académica na USC, foi impulsor de numerosas redes de investigación, proxectos nacionais e internacionais e director de 19 teses doutorais, consolidando unha escola de investigación propia con ampla proxección internacional. A súa investigación centrouse especialmente nos métodos categóricos, homolóxicos e computacionais aplicados a estruturas alxébricas non asociativas, un campo no que realizou contribucións clave e desde o que contribuíu decisivamente á consolidación da comunidade alxébrica galega e á proxección exterior da investigación matemática desenvolvida en Galicia. A investigación alxébrica en Galicia A investigación en álxebra en Galicia consolidouse como un ámbito de referencia grazas a décadas de contribucións científicas de alto nivel e a unha presenza continuada no panorama académico internacional. Neste marco, o Centro de Investigación e Tecnoloxía Matemática de Galicia (CITMAga) integra entre as súas prioridades estratéxicas o fortalecemento da investigación e a formación especializada do seu persoal nesta área clave das matemáticas. A celebración deste encontro constitúe non só un recoñecemento á excelencia investigadora de Manuel Ladra, senón tamén unha oportunidade para reivindicar o valor da álxebra contemporánea como ferramenta fundamental para o avance do coñecemento matemático e das súas múltiples conexións con outras áreas da ciencia. https://www.usc.gal/gl/xornal/novas/usc-homenaxea-traxectoria-catedratico-manuel-ladra-congreso-participa-efim-zelmanov-medalla-fields